Prezident Shavkat Mirziyoyev Baliqchi tumanidagi Sunʼiy intellekt markaziga tashrif buyurib, yoshlarning startap loyihalari bilan tanishdi.
“Akademiya IT Star” korxonasi tomonidan tashkil etilgan ushbu markaz davlatimiz rahbarining 2024-yil 26-fevraldagi raqamlashtirish sohasida xizmatlar eksportini rivojlantirishga doir qarori asosida barpo etilgan.
Axborot texnologiyalari yoshlar uchun eng talab yuqori boʻlgan sohalardan biriga aylanmoqda. Shu bois, hududlarda zamonaviy AT kasblarni egallash, amaliy koʻnikmalarni rivojlantirish va raqobatbardosh dasturiy mahsulotlar yaratish uchun sharoitlarni kengaytirish muhim ahamiyatga ega.
Loyihaning umumiy qiymati 15 milliard soʻmni tashkil etib, 100 ta ish oʻrni yaratilgan.
Markaz qishloq va tuman yoshlariga boshqa hududlarga bormasdan, oʻz yashash joyida zamonaviy bilim va kasblarni egallash imkonini bermoqda. Bu yerda marketing, dasturlash va robototexnika yoʻnalishlarida taʼlim berilib, yoshlar olgan bilimlarini amaliy loyihalarda qoʻllamoqda.
Muassasa imkoniyatlaridan mahalliy tadbirkorlar ham samarali foydalanmoqda. Ularga sunʼiy intellekt asosida biznesni rivojlantirish boʻyicha maslahat va AT xizmatlari koʻrsatiladi. Shu kunga qadar 500 dan ortiq tadbirkorlik subyektiga jami 8,5 milliard soʻmlik xizmat koʻrsatilgan.
Bugungi kunda viloyatdagi 65 mingta tadbirkorlik subyekti uchun SMM-menejer, mobilograf, grafik dizayner, marketolog, maʼlumotlar tahlilchisi va sunʼiy intellekt mutaxassislariga ehtiyoj 129 ming nafardan ortiqni tashkil etmoqda. Markazdagi taʼlim dasturlari ana shu talabdan kelib chiqib shakllantirilgan.
Davlatimiz rahbari yoshlar yaratgan startaplar bilan yaqindan tanishib, ularning bilim va intellektual salohiyatiga yuqori baho berdi. Samimiy muloqot davomida yigit-qizlar mamlakatimizda startap ekotizimini yanada rivojlantirishga qaratilgan yangi tashabbus va takliflarini bildirdi.